Absenteeism ဆိုတာဘာလဲ
ဝန်ထမ်းတစ်ဦးဟာ လုပ်ငန်းခွင်ကနေ အကြောင်းတစ်ခုခုကြောင့် ပုံမှန်ပျက်ကွက်နေခြင်းကို Absenteeism လို့ခေါ်ပါတယ်။ ဝန်ထမ်းတစ်ဦးအနေနဲ့ တစ်နှစ်မှာ ခွင့်ရက်အနည်းငယ် ယူခြင်းက ပုံမှန်အခြေအနေဖြစ်ပေမယ့် လိုအပ်တာထက်ပိုပြီး အလုပ်ပျက်ကွက်ခြင်း ကတော့ လုပ်ငန်းရဲ့ ကုန်ထုတ်လုပ်မှုကို ကျဆင်းစေပြီး ဘဏ္ဍာရေးပိုင်းကိုလည်း ထိခိုက်စေရုံသာမကပဲ အခြားသော ဆိုးကျိုးများကိုလည်းဖြစ်ပေါ်စေပါတယ်။
ဘယ်လိုအကြောင်းရင်းတွေက Absenteeism ကို ဖြစ်စေသလဲ
Absenteeism ကို ဖြစ်စေတဲ့ အကြောင်းရင်းများစွာရှိတဲ့အနက် အောက်ပါအချက်တွေက အဓိကကျတဲ့ အကြောင်းရင်းတွေ ဖြစ်ပါတယ်။
- ဝန်ထမ်းကိုယ်တိုင် နေထိုင်မကောင်းဖြစ်ခြင်း
- မိသားစုဝင်များ နေထိုင်မကောင်းဖြစ်သဖြင့် စောင့်ရှောက်ရခြင်း
- လုပ်ငန်းခွင်၌ ထိခိုက်ဒဏ်ရာရရှိခြင်း
- အလုပ်တာဝန်များပြားသောကြောင့် စိတ်ဖိစီးခြင်း
- စိတ်ဓာတ်ကျဆင်းခြင်း
Absenteeism က လုပ်ငန်းခွင်ကို ဘယ်လိုထိခိုက်စေနိုင်သလဲ
Absenteeism ဟာ အဓိကအားဖြင့် လုပ်ငန်းရဲ့ ထုတ်လုပ်နိုင်စွမ်းအား (productivity) ကို ဆိုးရွားစွာ ကျဆင်းစေပါတယ်။
Gallup-Healthways Well-Being Index က အမေရိကန်နိုင်ငံမှာရှိတဲ့ ကုမ္ပဏီပေါင်း ၁၄ ခုမှ ဝန်ထမ်းပေါင်း ၉၄၀၀၀ ကို စစ်တမ်းကောက်ယူခဲ့ရာမှာ ထုတ်လုပ်နိုင်စွမ်းအား ကျဆင်းမှုကြောင့် တစ်နှစ်တာဆုံးရှုံးမှုဟာ ကန်ဒေါ်လာ ၈၄ ဘီလျံခန့်ပင်ရှိကြောင်း တွေ့ရပါတယ်။ ဒီလိုဆုံးရှုံးရမှုထဲမှာ ပျက်ကွက်ဝန်ထမ်းအတွက် လစာ ပေးချေရခြင်း၊ အစားထိုး ယာယီဝန်ထမ်းအတွက် ငွေကြေးကုန်ကျခြင်း၊ Absenteeism အတွက် စီမံခန့်ခွဲရေးစရိတ်များ ကုန်ကျခြင်း စတာတွေ အဓိကပါဝင်ပါတယ်။
လုပ်ငန်းရှင်တွေအနေနဲ့ Absenteeism ကို ဘယ်လိုဖြေရှင်းနိုင်မလဲ
Absenteeism ဖြစ်ရတဲ့အကြောင်းရင်းတွေကို ကြည့်ရင် ကျန်းမာရေးကိစ္စ (ရုပ်ပိုင်းဆိုင်ရာ၊ စိတ်ပိုင်းဆိုင်ရာ) တွေကြောင့် အများဆုံးဖြစ်တာတွေ့ရပါတယ်။ ဒါကြောင့် လုပ်ငန်းရှင်တွေအနေနဲ့ Absenteeism ကို ဖြေရှင်းနိုင်ဖို့ဆိုရင် ဝန်ထမ်းတွေရဲ့ ကျန်းမာရေးကို အလေးထားဆောင်ရွက်ပေးဖို့လိုပါတယ်။ လုပ်ငန်းခွင် ကျန်းမာရေး၊ လုပ်ငန်းခွင်ဘေးကင်းရေးတွေကို အဓိကထား ဆောင်ရွက်ဖို့လိုပါတယ်။
ဒါ့အပြင် ဝန်ထမ်းတွေရဲ့ ကျန်းမာရေးဆိုင်ရာ အသိရေချိန်ကိုလည်း မြှင့်တင်ပေးဖို့လိုပါတယ်။ ဒီလိုဆောင်ရွက်တဲ့အခါမှာ လုပ်ငန်းရှင်များအနေနဲ့ ကျန်းမာရေးအာမခံလုပ်ငန်းများနဲ့ ပူးပေါင်းဆောင်ရွက်ဖို့လိုအပ်သလို ခေတ်မီကျန်းမာရေး စောင့်ရှောက်မှုစနစ်တွေကိုလည်း အသုံးပြုသင့်ပါတယ်။
နည်းပညာတိုးတက်လာတဲ့ ဒီနေ့ခေတ်မှာ Telehealth စနစ်ဟာလည်း Absenteeism ကိုဖြေရှင်းဖို့ ထိရောက်တဲ့နည်းလမ်းတစ်ခု ဖြစ်လာပါတယ်။ Absenteeism ကို ထိရောက်စွာ ဖြေရှင်းနိုင်မှသာ လုပ်ငန်းများအနေနဲ့ ထုတ်လုပ်မှုစွမ်းအားတိုးတက်လာပြီး မိမိတို့လုပ်ငန်းရဲ့ သက်ဆိုင်ရာ မျှော်မှန်းချက် (Vision) ကို ဖော်ဆောင်နိုင်မှာပဲ ဖြစ်ပါတယ်။
